కాకినాడలో సీఎం చంద్రబాబుకు మత్స్యకారుల కృతజ్ఞతా ర్యాలీ

ముఖ్యమంత్రి నారా చంద్రబాబు నాయుడు మత్స్యకార భరోసా హామీని నెరవేర్చడం పట్ల కాకినాడ మత్స్యకారులు వినూత్న రీతిలో తమ కృతజ్ఞతలు తెలియజేశారు. కూటమి ప్రభుత్వం వేట నిషేధ సమయంలో అందించే ఆర్థిక సహాయాన్ని రూ.20,000కు పెంచడం పట్ల సంతోషం వ్యక్తం చేస్తూ బోట్లపై ర్యాలీ నిర్వహించారు.

మత్స్యకార సామాజిక వర్గానికి చెందిన కాకినాడ సిటీ ఎమ్మెల్యే వనమాడి కొండబాబు ఆధ్వర్యంలో ఈ కార్యక్రమం జరిగింది. కాకినాడ జిల్లా ఏటి మొగ్గ నుంచి జగన్నాథపురం వంతెన వరకు సాగిన ఈ ర్యాలీలో మత్స్యకారులు పెద్ద సంఖ్యలో పాల్గొన్నారు. తమ బోట్లకు తెలుగుదేశం పార్టీ జెండాలను కట్టి ఉత్సాహంగా ప్రదర్శనలో పాల్గొన్నారు.

ఈ సందర్భంగా ఎమ్మెల్యే కొండబాబు మాట్లాడుతూ, సముద్రంపై ఆధారపడి జీవించే మత్స్యకారులకు వేట నిషేధ సమయంలో ఆర్థికంగా అండగా నిలిచేందుకు ముఖ్యమంత్రి చంద్రబాబు నాయుడు ఒక్కొక్కరికి రూ.20,000 ఆర్థిక సహాయం ప్రకటించారని తెలిపారు. రాష్ట్రవ్యాప్తంగా మత్స్యకారులు "థాంక్యూ సీఎం సార్" కార్యక్రమాల ద్వారా ప్రభుత్వానికి ధన్యవాదాలు తెలుపుతున్నారని ఆయన అన్నారు. 

స్వాతంత్ర్యం వచ్చిన తర్వాత ఎందరో ముఖ్యమంత్రులు మారినప్పటికీ, చంద్రబాబు నాయుడు మాత్రమే మత్స్యకారుల జీవన ప్రమాణాలను మెరుగుపరిచేందుకు కృషి చేశారని, వారికి వలలు, ఇంజిన్లు, బోట్లు అందించి ఆర్థికంగా తోడ్పడ్డారని కొండబాబు పేర్కొన్నారు. గతంలో టీడీపీ హయాంలోనే మత్స్యకారులకు బీమా సౌకర్యం కల్పించిన విషయాన్ని కూడా ఆయన గుర్తు చేశారు.